Elstu stúlkurnar okkar voru í skógarferð í dag og þvílík fegurð sem er í dalnum okkar. Það snjóaði svo mikið í nótt að allt umhverfið var eins og hulið mjúku hvítu teppi.

Á föstudaginn blótuðum við þorra. Það skein ánægja úr hverju andliti og mikið var borðað af þjóðlegum réttum. Við vorum með nýjung á eldri deildum skólans sem fólst í því að þorramatnum var komið fyrir á hlaðborði og börnin fóru síðan eins oft og þau vildu að borðinu og fengu sér þann mat sem þau vildu. Það koma okkur satt að segja á óvart hversu dugleg þau voru að fá sér að smakka súrmatinn og hákarlinn. Sum þeirra voru mjög varkár í fyrstu og fóru fyrstu ferðina með flatkökur á disknum, en í næstu ferðum var svo sannarlega tekin áhætta og smakkað á súrmat og fl. Það var gaman að fylgjast með þeim, þau voru einstaklega ákveðin, áræðin og dugleg að bjarga sér sjálf við hlaðborðið. Hér má sjá myndir frá þorrablótinu.

Síðasti skipulagsdagur var helgaður vinnu við nýja Skólanámskra Furugrundar. Við hófum verkið með því að fara á hugarflug með "Heimskaffi aðferðinni". Það er aðferð sem notuð var á stóra þjóðfundinum í Laugardalshöll hér um árið. Það er skemmst að segja frá því að vinnan gekk framúrskarandi vel og sköpuðust frábærar umræður um framtíð leikskólans. Margar góðar hugmyndir komu fram og voru þær síðan flokkaðar eftir námsviðum þeim sem aðalnámskrá leikskóla gerir ráð fyrir. Á næsta skipulagsdegi sem verður 24. febrúar nk. ætlum við að vinna ennfrekar að hverju námssviði fyrir sig og notumst þá aftur við sama fyrirkomulag. Við viljum svo einnig kalla eftir hugmyndum foreldra um skólastarfið og munum gera það með rafrænni könnun í apríl. Hér má sjá myndir af starfsfólki leikskólans við vinnu sína.

Við erum svo heppin að þessa dagana eru nemendur í 7. bekk Snælandsskóla að æfa sig fyrir Stóru upplestrarkeppnina. Upplestrarkeppnin er árlegur viðburður sem hægt er að fræðast um á heimasíðu keppninnar. Við njótum góðs af því nemendurnir æfa sig með því að lesa fyrir elstu börnin okkar sögur sem börnin velja.